Ymgynghoriad cyn ymgeisio ar gyfer Fferm Solar Larnog ar agor

Mae Trydan Gwyrdd Cymru, cwmni ynni adnewyddadwy sy'n eiddo i Lywodraeth Cymru ac yn gweithredu gyda ac ar ran pobl Cymru, yn gwahodd pobl leol i gymryd rhan yn yr ymgynghoriad statudol cyn cyflwyno cais ar gyfer Fferm Solar arfaethedig Larnog.

Wedi'i lleoli yn Larnog, rhwng Sili a Phenarth ym Mro Morgannwg, byddai'r prosiect yn gwneud cyfraniad pwysig at ddiogeledd ynni drwy ddarparu tua 35 MW o gapasiti ynni glân gosodedig – digon i bweru tua 13,800 o gartrefi cyffredin yng Nghymru.*

Mae cynlluniau ar waith i wella natur ledled y safle, yn ogystal â chronfa budd cymunedol flynyddol o £400 am bob MW o gapasiti gosodedig; swm sy'n cyfateb i fwy na hanner miliwn o bunnoedd dros oes y prosiect.

Dywedodd Daniel Patterson, Rheolwr Prosiect Trydan Gwyrdd Cymru:

“Rydym ni’n edrych ymlaen at ddychwelyd at y gymuned leol yn dilyn ein hymgynghoriad anffurfiol yn gynharach eleni, a roddodd gyfle gwerthfawr i ni glywed barn trigolion.

“Ers hynny, rydym ni wedi ystyried y sylwadau a dderbyniwyd yn ofalus, wedi siarad ag arbenigwyr lleol ac wedi cynnal arolygon pellach ar y safle. Defnyddiwyd yr holl wybodaeth hon i lunio dyluniad y prosiect.

“Mae'r cyfnod ymgynghori statudol hwn yn cynnig cyfle pellach i breswylwyr rannu eu barn, er mwyn sicrhau bod y prosiect hwn yn dod â buddion parhaol i Fro Morgannwg.”

Bydd yr ymgynghoriad yn rhedeg o 11 Tachwedd i 15 Rhagfyr 2026. Mae Trydan Gwyrdd Cymru yn cynnal dau ddigwyddiad galw heibio lle gall trigolion weld byrddau gwybodaeth a mapiau o’r prosiect, darllen drafft y cais cynllunio, a rhoi adborth. Cynhelir y digwyddiadau yn Neuadd Gymunedol Penarth Isaf ar: 

• 3yp-7yp, Dydd Gwener 13 Tachwedd 2026

• 10yb – 2yp, Dydd Sadwrn 14 Tachwedd 2026

Bydd deunyddiau’r ymgynghoriad a ffurflen adborth ar-lein ar gael ar y we trwy gydol yr ymgynghoriad yn www.trydanlarnog.cymru.